今屆多場淘汰賽都睇到大家熱血沸騰，早幾天葡萄牙對克羅地亞的32強，兩邊的詐胡波更加睇到大家「嘩嘩聲」同「唉唉聲」不斷，真精彩！葡萄牙驚險過關之後，16強將與西班牙上演「雙牙大戰」，大家豈能錯過？文:舜文
葡軍突破及傳中波輸蝕
相對葡萄牙的抹一額汗，「狂牛兵團」西班牙32強對奧地利則明顯舒服得多。雖然球迷目光一直放在拉明耶馬身上，別忘記左中場阿歷斯巴爾拿演出都很出色。他靈巧多變的技術，成功平衡了球隊兩邊攻勢。
另外，西班牙前鋒奧耶沙巴爾經過對佛得角的「隱形演出」之後，近仗已完全重拾入球節奏，上仗他兩度配合古古列拿的傳中球，成為心有靈犀的拍檔。「狂牛兵團」中前場唯一要挑剔的，就是丹尼爾奧莫仍然有點迷失。
若論中場掌控力，葡軍其實不會比西班牙遜色，不過邊路突破及傳中球，明顯「狂牛兵團」能創造更多機會，前線球員的拉扯空位配合中場的後上，令戰術更加生動。防守方面，門將烏尼西蒙已打破意大利鋼門辛格的世盃最長不失球紀錄，今屆分組賽至淘汰賽，對手射門次數均被限制在3至6次之間，看來西班牙今晚可以稍為秤高少少。
