歐國聯A2組另一場上演榜首之爭，荷蘭主場迎戰希臘。兩隊經過4場歐國聯，同樣錄得2勝2和得8分未輸過，荷蘭以較佳得失球排榜首，睇番雙方上次交手踢成2比2平手，今場再和唔出奇，何況希臘今場受讓一球，就算輸一球都係走盤，捧下盤有着數。
（周六凌晨3時45分開賽）文:邪神
荷蘭VVD缺陣讓一球太多
荷蘭今夏世盃32強出局後換帥，改由沙維領軍，過去4場雖然保持不敗，但其中兩場和波都有幸運成分，主場對德國要靠加普補時2分鐘追和先唔使輸，作客希臘嗰場仲驚險，上半場先輸兩球，下半場力追之下到完場前1分鐘先靠雷恩達斯入波追和，今場再鬥希臘，雖然有主場之利，但隊長華基爾雲迪積克（VVD）缺陣，而且讓一球實在太多，要淨勝兩球先贏盤，可能性唔高。
希臘今屆升上A組，表現予人驚喜，兩戰德國獲1勝1和，今場作客荷蘭只要唔輸，尾輪再擊敗已出局嘅塞爾維亞，就可晉級8強；希臘防守出名硬淨，前線就有進攻鐵三角，包括阿仙奴嘅謝索利斯、賓菲加嘅柏夫利迪斯同士砵亭嘅伊安尼迪斯，荷蘭後防唔算嚴密，近4場都有失波，希臘今場只要入到波，下盤基本上穩陣。
