今晚歐國聯頭場之一，有另一場A4組賽事挪威主場迎戰威爾斯。雙方仍有出線機會，以艾寧夏蘭特為首嘅挪威鋒線例搶韁，不過「紅龍」近年唔赦挪威，隨時一開波即埋牙，捧1.5球半場大更划算。（周日凌晨1時開賽）文:法達斯維
威爾斯反擊至煞食
先講A4組形勢，雖然挪威同威爾斯同樣僅得3分，但次席丹麥亦只有6分，爭次名晉級仲未絕望，當然先決條件係做好本分贏波，尤其挪威尾輪就係同丹麥正面交鋒，今場擸晒3分仲有價講。挪威亦精銳盡出，馬田奧迪加特、阿歷山大索洛夫、安東尼奧努沙、艾寧夏蘭特等中前場悉數入選，佢哋近5仗4次半場開2球或以上，今仗必定想先發制人。
另邊廂，威爾斯亦唔係好蝦，特別係對親挪威甚有心得，雙方之前4次碰頭，「紅龍」取得3勝1和未輸過，包括上月主場贏2比1，似乎有啲格食格味道。加上佢哋嘅情況同挪威一樣，最尾2輪贏晒仍有機會晉級，陣中亦有哈利威爾遜、丹尼爾占士、利維斯古馬斯等英超兵助陣。挪威今場主動進攻下，反而更有利威爾斯打最擅長嘅快速反擊，預計一開波大家即嚟料，捧半場大博早啲收錢。
