澳職季後賽4強首回合，FC悉尼主場迎戰常規賽冠軍中岸水手。FC悉尼去到季尾狀態大勇，霸氣唔差得過中岸水手，而且今年兩次交鋒，FC悉尼都順利贏波，成為「水手剋星」，今仗撐FC悉尼旗開得勝。
（無綫myTV SUPER周五下午5時45分直播）
FC悉尼上場季後賽淘汰圈，主場4比0大炒FC麥克阿瑟，連埋常規賽煞科戰7比1狂數珀斯光輝，近2場賽事狂入11球。FC悉尼主場氣勢凌厲，近10場主場取得8勝2和，當中就曾2比0擊敗今場對手中岸水手，首回合主場肯定要食住個勢搶頭威。
格食格專恰水手
中岸水手今季橫掃澳職，表現極為穩定，佢哋喺2024年所踢24場比賽，只係輸過2場，但呢兩場波無獨有偶都係輸畀FC悉尼，分別輸1比3同0比2；睇番兩隊近4次對賽，FC悉尼法定時間有3勝1和，今場博主勝。
