今晚英超尾場上演重量級對決，熱刺喺主場迎戰曼城。雖然熱刺今季戰績唔掂，但近年交手經常佔上風，證明佢哋穩守突擊戰術奏效，「藍月亮」不得不防，幸好馬克古希及時加盟，有助鞏固防線，預計雙方今場都會步步為營，採取穩陣行先，捧2.5球入球細最上算。（Now 621及611周一凌晨零時30分直播）文:法達斯維
熱刺近5場聯賽未贏過，除咗李察利臣、古度斯、祖奧包連夏及賓坦古亞等未好番之外，連右閘柏度樸路都傷埋，中堅雲迪雲亦未知能否趕及今仗復出，令主帥法蘭克喺用人上捉襟見肘，今仗面對勁旅曼城，採取保守打法亦無可厚非。不過，熱刺近年靠穩守突擊戰術，經常可以剋住「藍月亮」，兩軍之前4次交手，熱刺取得3勝1負，加上日前歐聯順利殺入16強，球員士氣大振，今仗勢必照辦煮碗。
踢穩陣波見好就收
另邊廂，曼城之前陷入中堅荒，史東斯、魯賓戴亞斯及加華度爾先後受傷，一度焗用小將麥斯阿利尼及卡胡辛洛夫擔大旗，結果令之前聯賽接連失分。幸好「藍月亮」喺冬窗及時簽入水晶宮隊長馬克古希，有呢名英格蘭國腳領導之下，的確令防線回穩，上仗聯賽即贏狼隊2比0，終止聯賽4場不勝困局，尤其係射手艾寧夏蘭特腳風欠順，近5場聯賽全開2球或以下，就算上周中歐聯對加拉塔沙雷，早早領先後即見好就收，最終只係贏得2比0，可見「藍月亮」近期都打穩陣波，今仗造訪剋星隨時踢得更小心，2.5球入球細係最佳選擇。
