國際賽期間，日本呢邊編排日聯盃8強賽事，今日先踢首回合，嚟緊周日踢次回合。同大家研究一場重量級大戰，川崎前鋒主場迎戰柏雷素爾，兩隊實力接近，佔主場之利嘅川崎前鋒自然有着數，加上今場係首回合，川崎前鋒將力爭先拔頭籌，主隊受讓平半，下盤值博。
（無綫 myTV SUPER周三晚6時直播）文:邪神
兩隊剛喺日職碰頭，結果川崎前鋒作客輸1比2，今仗返主場出擊勢必大報復。佢哋5、6年前橫掃日職，不過近年因為換血成績下跌，前主教練鬼木達兩年前離隊，長谷部茂利接掌教鞭後繼續重組，球隊今季終於重拾佳態，其中射手馬仙奴腳風順，今仗將負起入球重責。
川崎前鋒主場表現尤其出色，主場甚少輸波，近8仗主場錄得6勝1和，僅輸1仗，今場就算未能取勝，至少都唔會輸，受讓平半之下，下盤更加抵玩。
柏雷素爾作客讓唔起
柏雷素爾係上屆亞軍，今屆捲土重來，而且睇今季表現，柏雷素爾無疑係較好一隊，不過作客讓波就有啲過火，而且就算今仗失利，仍有把握喺次回合翻盤，加上佢哋較早前曾作客不敵大阪櫻花及全北汽車，今仗為防開壞個頭，必先注意防務，贏唔到並唔出奇。
